Migne Patrologia Latina Tomus 135
Invocatio
Invocatio (Flodoardus Remensis), J. P. Migne 135.0491B
Invocatio
135.0491A| Lux immensa Deus, mundum fulgore serenans,
Aetheraque aeternae collustrans lucis amoeno,
Sidereo astriferum pingis qui lumine coelum:
Qui mare, qui terras diva ratione coerces,
Aera plumigeris exponis, nautibus aequor;
Graminibus silvisque virentia rura venustans,
Diversi generis formaeque animantibus imples:
Queis hominis cunctoque orbi praeponis honorem,
Quem signare tui statuisti lumine vultus,
Inspirans animam coelestis imagine comptam
Splendoris, superaeque infundens stemmata lucis,
Secernis sensu reliquis animalibus alto.
Quem desciscentem tenebris a lumine summo,
Tartareis addictum umbris et ad ima volutum,
Per veram, testem radiantem lumine lucem,
Perque pios comites coeli candore nitentes,
Ad verum revocas lumen vitamque perennem
Praecipui divina raptum ditione triumphi.
Sensibus inde meis, vero de lumine lumen,
135.0491B| Illustrans animos, tua dicere carmine nitor
Celsa tropaea, quibus servos super astra decoras.
Flamine corda replens, almo tu dirige sensu,
135.0492A| Da votis celebrare tuos modulisque triumphos
Queis coelo terraque tui comuntur alumni,
Virtutum pennis astrorum celsa petentes,
Luceque coelesti rimantur caeca profundi:
Flores qui rutilos fructusque dedere beatos,
Sordida dum gregibus removes animalia mundis,
Quos validae pietas fidei super omnia mundi
Regna levat, coelique altis in sedibus aptat,
Nectare quae divo gaudent ac lumine summo,
Saeculaque irradiant verbis palmisque coruscis.
Non ego cuncta meo conor concludere cantu
Quae maris exsuperant undas et sidera coeli;
Laeta sed ingrediens aliquos decerpere flores
Tendo vireta quibus nexum volo pingere sertum;
Ut dum bella cano celebresque retexo coronas
Quorum digna tropaea humili describere voto
Nitor, eis valeam saevum auxiliantibus hostem
Vincere serpentisque dolos evadere vafri,
Livida sic possim lacrymis commissa piare,
135.0492B| Fletibus ut Stygias merear restingere flammas:
Vellereque indutus, vacuatis sordibus, albo
Purgantis mundum dextris admittier Agni.
(no apparatus)