Migne Patrologia Latina Tomus 94
De urbe Roma (Auctor incertus (Beda?)), J. P. Migne
Roma, urbs in Italia, totius quondam orbis domina, a conditoris sui Romuli nomine sic vocata: quam propter eximiam virtutem plerique scriptorum quasi sola esset, appellare Urbem malebant. Quae quidem, ut Orosius in chronica sua commemorat, post annos quatuor millia quadringentos quadraginta septem, id est, septingentesimo quinquagesimo secundo ante incarnationem Domini anno, condita est.
(0656A)Nobilibus quondam fueras constructa patronis,
Subdita nunc servis, heu male Roma ruis.
Deseruere tui tanto te tempore reges,
Cessit et ad Graecos nomen honosque tuus.
Constantinopolis florens, nova Roma vocatur,
Moribus et muris Roma vetusta cadis.
Transit et imperium, mansitque superbia tecum.
Cultus avaritiae te nimium superat.
Vulgus ab extremis distractum partibus orbis,
Servorum servi, nunc tibi sunt Domini.
In te nobilium rectorum nemo remansit,
Ingenuique tui, rura Pelasga colunt.
Truncasti vivos crudeli funere sanctos,
Vendere nunc horum mortua membra doles.
Nam nisi te meritum, Petri Paulique foveret,
Tempore jam longo Roma misella fores.